Want wanneer hulle die kinders sien wat Ek aan hulle gee, sal hulle my heilige Naam eer; hulle sal die heilige God van Jakob eer, hulle sal ontsag hê vir die God van Israel – Jesaja 29:23.
Ons kinders laat ons besef hoe magteloos ons as ouers is. Deur hulle kry ons nuwe ontsag vir God. Ons besef meer as ooit die krag van gebed. Kinders moet egter nie bloot weet dat hul ouers vir hulle bid nie. Hulle moet dit hoor en sien.
Mark Batterson vertel dat sy oupa saans sy bril afgehaal en sy gehoorstukke uit sy ore gehaal het. Daarna het hy by sy bed gekniel en hardop vir sy nageslag gebid. Self kon hy nie sy gebed hoor nie, maar almal in die huis kon duidelik hoor hoe hy by name vir sy kinders en kleinkinders intree.
My eie ouers het Sondagaande saam hardop vir ons kinders gebid. Daardie gevoel van gelief wees, geborge voel en veilig aan God se sorg toevertrou word, het my my lewe lank bygebly, veral in onseker alleentye weg van die huis. Wanneer God ver gevoel het, was hul gebede ’n ankertou wat my lewensbootjie veilig aan die vaste hawe vasgemeer het.
Ons moenie slegs vír ons kinders bid nie. Ons moet ook sáám met hulle bid. Dan besef hulle dat ons as ouers ook van ons hemelse Vader afhanklik is. Ons kinders ervaar dat ons ook nie alles weet nie. Hulle deel in klein heilige oomblikke wanneer ons onsself voor God blootstel. Hulle sien ons onmag en weerloosheid. Hulle beleef ons soeke na wysheid.
Here, help my verstaan dat afhanklikheid van U ook wysheid is. Amen.
