Of verstaan julle nie dat julle liggame ’n tempel van die Heilige Gees is wat in julle woon en deur God aan julle gegee is nie? Julle behoort nie aan julleself nie, want julle is teen ’n duur prys gekoop. Daarom moet julle God met julle liggaam verheerlik.
– 1 Korintiërs 6:19-20
Nadat ek die kabels aan die verkeerde punte van my motor se battery gekoppel het, het ek moedeloos in my dooie motor buite Parys gesit en wonder hoe ek gaan terugry stad toe.
Ek het ’n plaaslike inwoner met die laaste bietjie batterykrag in my selfoon gebel. Die Samaritaan het vasgestel dat ek ’n paar belangrike fuses geblaas het toe ek die kabels verkeerd gekoppel het. ’n Fuse is ’n baie klein deeltjie van ’n motor, maar tog speel dit ’n geweldig belangrike rol in die meganiese werking van enige motor. Ek sou nie kon terugry stad toe sonder dat die nodige fuses vervang word nie.
Dit het my aan die mens se liggaam laat dink. Net soos ’n motor het ons ’n ingewikkelde samestelling met baie klein fuses wat gereeld nagegaan moet word. Vandag se Bybelvers sê ons liggame behoort aan God – dis die tempel waarin sy Gees woon. Ons moet daarom
verstandig optree teenoor ons liggame en dit goed onderhou met gesonde kos, genoeg slaap en ’n gebalanseerde leefstyl.
Nie een van ons is bullet proof nie. Maak daarom seker jy druk nie jou liggaam te ver en blaas ’n paar fuses nie. Gesondheid is ’n geskenk en ’n groot voorreg om te geniet. Eers wanneer ons dit verloor, besef ons wat ons gehad het.
Bruisgebed vir gesondheid: Here, help my om my liggaam nie af te skeep nie, maar dit met ’n gesonde leefstyl te versorg, soos U van u kinders vra.
Susan Coetzer, Bruistablette vir die lewe, 2018. Gereproduseer met toestemming van Lux Verbi, ’n druknaam van NB-Uitgewers.
