Vir die regverdiges lê daar vreugde voor; die goddeloses het geen toekoms nie – Spreuke 10:28.
Ons begeer gelukkige eindes. Ons lees boeke waarin die held en die heldin mekaar uiteindelik vind en lank en gelukkig saamleef. Ons kyk flieks waarin die goeie die bose oorwin en ons voel weer goed oor die lewe.
Tog weet ons die lewe is nie so eenvoudig nie. Ons beleef onreg, droefheid, verlies, afskeid, geweld, die dood. Ons is nie teen swaarkry gevrywaar nie, want ons lewe in ’n stukkende wêreld wat nog kreun onder die nasleep van die sondeval. Ons is deel van ’n onvolmaakte werklikheid terwyl ons nog op aarde is.
En tog wink daar ’n gelukkige einde vir dié wat vasklou aan die hoop in Christus. Vir die regverdiges wag daar ewige vreugde.
In die rolprent When Harry met Sally vertel Harry dat hy altyd die laaste bladsy van ’n boek eerste lees. Dan weet hy hoe die verhaal eindig. Indien hy sou sterf voordat hy die boek klaar gelees het, het hy die lekkerte van die einde ervaar. Hy kan dus ontspan terwyl hy lees, sonder vrees vir wat gaan gebeur.
In ’n sin is dit waar van ons wat in Christus glo. Ons weet wat die einde van ons aardse boek is. Dit is die ewige lewe. Wanneer sommige hoofstukke vol pyn en swaarkry is, kan ons weer ons kop oplig en met hoop aangaan. Ons ken die einde.
Here, dankie dat dood nie die einde van my lewe is nie. Amen.
