So sal ons uiteindelik almal kom tot die werklike eenheid in ons geloof en in ons kennis van die Seun van God (Efesiërs 4:13).
Nog ‘n plek waar volgens die Bybel die God van Christus bekend word, is deur ander mense – spesifiek hulle wat ons pad kruis en ons nodig het.
Duidelik sê Jesus dit in Matteus 25:31-46 – waar ons barmhartigheid aan die hongeriges, die beklemdes en die siekes bewys, is dit so goed of ons dit aan Jesus persoonlik doen. Die filosoof, AE Loen, sê tereg dat hierdie uitspraak van Jesus dit vir ons byna prakties onmoontlik maak om die God van die armes op die paaie van die lewe te ontduik.
Want telkens tree God ons tegemoet en vra van ons ‘n antwoord in die aansprake van ons noodbehoewende naaste. Wat ‘n ontsettende gedagte!
Maar God tree ons ook tegemoet in hulle wat ons raadgee en op die lewenspad ondersteun – my broer en suster in die geloof. Hulle wat hulleself één met my voel en my met liefde omhels en bystaan. Só word ek deel van Christus se liggaam en groei ek, aldus Paulus, in die kennis van die Seun van God, ja, van God self (Efes 4:13).
Ja, ook in die vreemdeling kan God my kom aanraak en aan my verklaar. So beeld die bekende ikoon van Andrei Rublev die besoek van die drie vreemdelinge aan Abraham in Genesis 18:1-15 uit as die verskyning van Drie-enige God self.
Wat ons nog eens daaraan herinner dat die Godheid heelwat nader aan ons kan wees as wat ons party dae vermoed.
Here, dankie vir mense vandag waardeur U self ons tegemoet tree. Help ons om U te herken. Amen
Carel Anthonissen
