Ek bid dat Hy julle geestesoë so verhelder dat julle kan weet watter hoop sy roeping inhou, en watter rykdom daar is in die heerlike erfenis wat Hy vir die gelowiges bestem het.
– Efesiërs 1:18
Het jy al opgelet hoe mense se oë ophelder wanneer hulle goeie nuus kry? Ek het ook al gesien hoe mense wat verlief is se gesigte van vaal in blosend verander wanneer hulle hulle geliefde sien. Verliefdes kry letterlik ’n helder blos op die wange.
Net so kan ons innerlike mens verhelder word wanneer ons Jesus se Goeie Nuus in ons harte inneem en dit deel van ons leefstyl maak. Wanneer die liefde van Jesus jou hart oorneem en jy op Hom verlief raak, begin die Gees van waarheid oor jou lewe heers.
Die gevolg van die Heilige Gees se diep en liefdevolle werking in jou is dat jou geestesoë begin verhelder. Jy sien die lewe en mense deur ’n nuwe bril. Dit is asof jy jou Clicks-bril vir ’n sterk ewigheidslens verruil wat tot in die hemelpoorte kan sien.
Wanneer jy deur God se bril en met helder geestesoë kyk, besef jy watter rykdom en heerlike erfenis vir elke gelowige bestem is. Dit is asof die skille van jou oë afval. Voorheen was jy blind, maar nou sien jy sy lig.
Paulus se geestesoë is oopgemaak deur sy ontmoeting met Jesus. Daarna het die bekeerde Paulus helder en duidelik gesien – ook sy verkeerde weë van vroeër. Die nuwe Paulus het hom sy lewe lank daaraan toegewy om ander mense se geestesoë oop te maak vir die
heerlike rykdom en voorregte wat daar in Christus Jesus is.
Bruisgebed vir blindes: Here, ek bid dat U my geestesoë sal opmaak en my deur ’n helder ewigheidslens sal laat kyk sodat ek die heerlike rykdom en voorregte kan raaksien wat daar in U vir my is.
Susan Coetzer, Bruistablette vir die lewe, 2018. Gereproduseer met toestemming van Lux Verbi, ’n druknaam van NB-Uitgewers.
