“En Ek sal die Vader vra en Hy sal vir julle ’n ander Raadgewer stuur om vir altyd by julle te wees; dit is die Gees van die waarheid. Die wêreld is nie in staat om Hom te ontvang nie omdat hy Hom nie sien of ken nie. Julle ken Hom egter omdat Hy by julle gaan bly en in julle sal woon. Ek sal julle nie soos wesies in die steek laat nie.”
– Johannes 14:16-18
Die woord inspirasie kom van die Latynse woord inspiritus, wat letterlik “asem van God” beteken.
Mense sê dikwels ek is ’n inspirasie – en dit verbaas my elke keer! In 2013 is ek selfs as Finesse se Inspirasievrou van die Jaar aangewys – en dit pas nadat ek geskei is en allesbehalwe soos ’n inspirasievrou gevoel het.
Ek besef egter wat die mense inspireer, is nie ék nie, maar die Here se goddelike werking (sy asem) wat deur my krake heen skyn en dan in my lewe sigbaar is. Alles in my wat goed en mooi en suksesvol lyk, is daar deur sy genade alleen. Ek kan op niks roem nie.
Ná baie kronkelpaaie en afdraaie weet ek my Here is die heel beste Mentor en Leermeester om inspirasie by te gaan haal. By Hom maak ek my battery vol, leer ek om my gawes te ontwikkel en word ek liefdevol gedissiplineer om geestelik te groei. Elke gelowige het toegang tot hierdie wonderlike gratis bron van inspirasie.
Mense wat uit die puinhope van die lewe opstaan en hulle lewe tot iets moois herbou, gryp my aan. Dis egter nie uit eie krag dat hulle dit regkry nie; dit is God se krag in hulle wat hulle in staat stel om nuwe hoogtes te bereik.
Bruisgebed vir inspirasie: Here, dankie dat ek altyd inspirasie by U kan vind. U is die kragtige asem in my en u krag stel my in staat om nuwe hoogtes te bereik.
Susan Coetzer, Bruistablette vir die lewe, 2018. Gereproduseer met toestemming van Lux Verbi, ’n druknaam van NB-Uitgewers.
