Aan U, Here, kom toe die grootheid en die mag en die heerlikheid en die roem en die majesteit, ja, alles in hemel en op aarde; aan U, Here, kom toe die koningskap en die selfverhoging as Hoof oor alles. En die rykdom en die eer kom van U, en U heers oor alles; en in u hand is krag en mag, en in u hand is dit om alles groot en sterk te maak. En nou, onse God, ons loof U, en ons prys u heerlike Naam – 1 Kronieke 29:11-13 (1933/1953-vertaling).
Onlangs kyk ek na ’n video-insetsel van ’n tienermeisie wat aan die Biblebee-kompetisie deelneem. Die beoordelaars gee die eerste paar woorde uit ’n Skrifgedeelte, waarna die deelnemers moet sê watter teksverse dit is, asook die betrokke gedeelte moet voordra.
Wanneer die meisie reg antwoord en die Skrifgedeelte hierbo begin voordra, word sy deur haar emosies oorval. Sy stort haar diepste binneste voor God uit. Sy vergeet van alles rondom haar. Haar woorde is direk tot God gerig: Die grootheid, Here, die krag, die glans, die roem en die majesteit behoort aan U, ja, alles in die hemel en op aarde … U is bo almal verhewe. Van U kom rykdom en eer. U heers oor alles.
Ná haar voordrag sê een van die beoordelaars: “Ons kan die Woord met ons intellek verstaan óf met ons hart aangryp. Jy het vir ons jou hart op die tafel gesit. Ons geloof in God bepaal ons optrede. Wanneer ons in Christus glo, wórd ons soos Hy. Ons hoef dit nie te probeer nie. Dit spoel van binne af buitentoe.”
Here, laat u Woord ook deur mý leef. Amen.
