Wie aardse besittings het en sy broer sien gebrek ly, maar geen gevoel vir hom het nie – hoe kan die liefde van God in hom [of haar] wees?
– 1 Johannes 3:17
Hoe lyk jou gevoelswêreld? Gee jy werklik diep genoeg vir ander mense om om jou hand uit te steek en hulle te help?
Meegevoel is ’n aksiewoord. Jy kan dit nie fake nie. As jy werklik meegevoel en deernis in jou hart het, sal jy nie gevoelloos kan optree nie, maar jy sal aangespoor word om proaktief te reageer en uit te reik na dié mense op jou pad wat jy weet in ’n lydenstyd is.
Die Woord sê die liefde van die Here kan nie in jou hart wees as jy jou broer of suster of vriend of vriendin sien gebrek ly en jy net by hulle verbystap nie. Dit is sterk woorde. Die gebrek waarvan hierdie Bybelgedeelte praat, is nie altyd liggaamlike gebrek nie; dit kan ook
emosionele of geestelike gebrek wees. Die lys van mense by wie ons maklik verbystap, bevat nie net die name van die bedelaars op straat nie. Bejaardes raak vergete; weduwees word aan hulle eie lot oorgelaat; enkelma’s, siek mense, geskeide mense beland op die vergeet-hoop.
Die Here gee in sy Woord vir ons ’n duidelike barometer om die omgeeliefde in ons harte mee te toets. Hy gebruik meegevoel as die toets. Hoe lyk jou hart se lesing wanneer dit by meegevoel kom? Word jou hart diep geraak deur ’n vriend se lyding en spoor dit jou aan om
te help? Of maak jy net jammer-geluide soos “ag, shame”?
Jesus se lewe getuig van opregte meegevoel en deernis. Hierdie meegevoel het Hom gedring om te gaan staan en iets prakties te doen om mense se swaarkry te verlig. Hy vra dieselfde van sy kinders.
Bruisgebed vir medelye: Dankie, Here Jesus, vir die voorbeeld van meegevoel en deernis wat U vir ons gestel het. U opregte omgeeliefde spoor my aan om te gaan staan en iets prakties te doen om die swaarkry van ander mense te help verlig.
Susan Coetzer, Bruistablette vir die lewe, 2018. Gereproduseer met toestemming van Lux Verbi, ’n druknaam van NB-Uitgewers.
