Julle moet julleself distansieer van alle slegte gedrag, van elke vorm van valsheid, van voorgee wat julle nie is nie, van jaloesie en alle kwaadpratery. Hiervoor moet julle genoeg geestelike melk inkry. Smag daarom na hierdie voeding soos pasgebore babatjies na hulle ma se melk sodat julle daardeur kan groei tot volwasse verlostes.
– 1 Petrus 2:1-2
Alle soogdiere wat kleintjies gaan kry, word toegerus met moedersmelk om hulle kleintjies te voed sodat hulle kan oorleef, groei en sterk word. Die ma hoef nie haar kleintjies te dwing om van die smaak van haar melk te hou nie. Hulle smag na hierdie voedsame moedersmelk
vanaf die oomblik dat hulle gebore word. Kyk maar net hoe gretig pasgebore hondjies aan hulle ma se spene suig, of ’n baba aan sy ma se bors. Ek self het dit weer beleef met die geboorte van my kleinseun. Die ou bekkie gaan die heeltyd oop op soek na melk. Te dierbaar!
Ons word in die Bybel aangemoedig om te groei tot volwassenes in die Here, om nie suigelinge in die geloof te bly nie. Ons kan egter nie geestelik groei sonder genoeg geestelike melk nie.
Daar is verskeie riglyne om geestelik volwasse in Christus te word. Dit vra nie net dat jy kerk toe gaan en die Woord lees voor jy gaan slaap om jou gewete te sus nie. Dit vra dat jy bewustelik ’n dieper honger na die Here se wil ontwikkel en sy Woord letterlik soos melk
indrink en gehoorsaam. Dit vra dat jy die sondige lekkernye en kos wat jou siel bederf, vermy.
As jy aanhou om ongesonde treats jou stapelkos te maak, sal jy geestelik onvolwasse bly en nie die heerlike rykdom ontvang wat daar in die Here se geestelike voedsel is nie.
Bruisgebed vir suigelinge: Vader, dankie vir die geestelike melk en voedsel in u Woord wat ons geestelik laat groei. Laat my elke dag daarna smag, soos ’n pasgebore baba na moedersmelk.
Susan Coetzer, Bruistablette vir die lewe, 2018. Gereproduseer met toestemming van Lux Verbi, ’n druknaam van NB-Uitgewers.
