Nee, Ek noem julle vriende, omdat Ek alles wat Ek van my Vader gehoor het, aan julle bekend gemaak het – Johannes 15:15b.
Jesus is die volmaakte vriend. Indien ons wil weet hoe vriendskap in die praktyk lyk, kan ons net na Hom kyk. Jesus het alles uitgeleef wat Salomo ons oor vriendskap leer.
André Oosthuizen, predikant van Universitasgemeente in Bloemfontein, sê in een van sy preke dat sosiale media soos Facebook, WhatsApp en Instagram ’n massiewe verskuiwing in ons verstaan van vriendskap gebring het.
“Vriendskap is verwater tot nuuskierigheid oor mekaar se lewe. Ons is nuuskierig oor wie waar is, wie wat gekry het en wie wat aanvang. Dan druk ons die ‘like’-knoppie of laat ’n kommentaar. Dit is dikwels die somtotaal van ons vriendskappe. Ons hou mekaar net dop.”
Oosthuizen sê indien Jesus vandag op aarde sou wees, baie mense sy profiel uit nuuskierigheid sou gevolg het. Hy sou baie “likes” gekry het, want Hy was ’n openbare figuur en het oral waar Hy gekom het, opspraak verwek.
Jesus was egter nie daarop uit om te sien hoeveel volgelinge en vriende Hy op sy “Facebookprofiel” het nie. Sy vriendskap op aarde was op ’n klein groepie mense toegespits. Hy het geweet dat vriendskap toewyding, tyd en gefokusde aandag verg.
Een van ons Afrikaanse spreekwoorde lui tereg: “Maak jou vriendelikheid goedkoop, maar jou vriendskap duur.”
Ons moet ons vriendskappe op Christus se voorbeeld skoei. Hy is die volmaakte Vriend.
En Hy nooi my uit om sy vriend te wees.
Here Jesus, dankie dat U my vriend wil wees. Amen.
