Hoe kan ‘n jongmens sy lewe skoon hou? Deur hom te hou aan u woord! (Psalm 119:9).
Soek u nog na ‘n mooi kersgeskenk?
Die bekende skrywer en teoloog, Dirkie Smit, se aangrypende nuwe boekie “Om te leef asof nie” (uitgegee deur Bybelkor), kan dalk net die ding wees.
Die boek is allereers meditasies, opgedra aan sy vriend en kollega van baie jare – die eertydse rektor van Stellenbosch, Russel Botman wat onlangs onverwags oorlede is.
Maar die boek is ook bedoel vir mense soos ons.
Mense wat worstel met die lewe en met hulle eie broosheid en alleenheid. Mense – veral ook jongmense – wat op soek is na sin en waarde vir hulle lewe, na egte moraliteit en menslikheid, na vryheid en geregtigheid vir alle ander.
Gedagtig aan die swaarkry waaronder almal moet deurloop, roep Dirkie Smit die woorde van die ou bekende, maar baie mooi Hallelujalied, in herinnering: “As die lewenstorme woedend om jou slaan, en jy gans ontmoedig vrees om te vergaan, tel jou seëninge, tel hul een vir een, en jy sal verbaas wees oor wat God verleen.”
Dit is ’n grondgedagte in dié boek.
Here, dankie vir woorde wat ons vandag weer herinner aan u seëninge. Amen
Carel Anthonissen
