Julle is tot vryheid geroep. Moet net nie julle vryheid misbruik as ‘n verskoning om sonde te doen nie, maar dien mekaar deur die liefde (Galasiërs 5:13).
‘n Vroom medestudent het altyd beweer dat die goeie God net één mens as vaste maat of huweliksgenoot vir jou bedoel het.
En vir daardie mens, so het hy verder geglo, moet jy in die loop van jou lewe biddend op die uitkyk wees. Hy of sy is vir jou bestel.
Gelukkig het Helmuth Thielicke, die bekende Duitse teoloog, my taamlik vroeg van hierdie eng, amper deterministiese siening, verlos.
Volgens Thielicke bestaan daar baie mense met wie jy eendag sou kon trou, of wel ‘n vaste verbintenis sou kon aangaan. Die groot uitdaging is om, wanneer jy eenmaal hierdie keuse met oortuiging en in liefde gemaak het, daaraan getrou te bly.
En dié getrouheid hoef nie te beteken – soos sommige grappenderwys beweer – dat jy nou jou nek in ‘n soort strop geplaas het waarin jy gevang is en waaraan jy vir die res van jou lewe sal moet wurg nie.
Inteendeel, die huwelik en ons verbintenis om getrou te bly, is juis ’n soort strop wat bevry.
Want wie eenmaal besluit het om te trou en só ook aan ’n ander trou te sweer, betree ‘n grootse avontuur, ‘n reis vol nuwe ontdekkings waarin albei geroep word om mekaar beter leer ken, dieper te waardeer en méér te respekteer. Ook ál meer geskool en gewillig word om die ander se laste en pyn met geduld, oorgawe en vreugde te leer dra.
‘n Huwelik wat ons nie hiertoe bevry nie, gaan mank aan vertroue en egte liefde.
O Here, maak ons vandag opnuut getrou aan U en aan mekaar. Amen
Carel Anthonissen
