NEEM KENNIS:
Jy ontvang jou dagstukkie net tot 15 Desember 2016 en weer vanaf 9 Januarie 2017. Aan ons vriendekring van meer as 9 000 intekenaars, wens ons ’n vreugdevolle en sinvolle Kerstyd vol liefde toe.
“Vra, en vir julle sal gegee word; soek, en julle sal kry; klop, en vir julle sal oopgemaak word” (Matteus 7:7).
Karl Barth sluit sy bekende preek oor God se genade af deur te wys op ʼn dilemma wat ons goed ken en wat gedurig in ons geestelike lewe opduik.
Dit is dat ons, al weet ons God se genade is daar vir óns, steeds sukkel om dit te glo. Of daaruit te leef.
Soos hy dit stel: “Die brood van die lewe word vir ons aangebied, maar in plaas daarvan om dit met oop hande te ontvang, bly ons ons vuiste bal. Die deure van die tronk is oop en tog, vreemd genoeg, verkies ons om binne te bly.”
In antwoord op die vraag waarom ons so traag is om te glo – ja, erger nog: waarom ons aan God se genade verbyleef, nie ons hande oopmaak om dit te ontvang nie, maak Barth ʼn verrassende opmerking. Ons vergeet om daarvoor te bid; ons faal om elke dag met ywer na God toe te draai en te vra dat God ons sal help om te verander. Sodat ons oë en hande sal oopgaan om God se genade te sien en met blydskap te ontvang.
Tereg herinner Barth ons dan:
“No human being has ever prayed for this in vain … Ask that you may believe this and it will be given you; seek this, and you will find it; knock on this door, and it will be opened to you.”
Wat ʼn tydige herinnering! Kom ons roep dan weer, al is dit net ʼn fluistering: “Here, wees my genadig!”
Here, ek kniel, ek buig, ek strek my hande uit na U – ek glo. Ontvang my nou soos ek is en gee my nog meer van u genade. Amen.
Carel Anthonissen
