Daarom het die Jode Jesus probeer vervolg, net omdat Hy dit op ’n Sabbat gedoen het. Maar Jesus het teenoor hulle reageer: “My Vader werk tot nou toe, en ook Ek is aan die werk.” Daarom het die Jode hulle nog meer beywer om Hom dood te maak.
– Johannes 5:16-18
Die Fariseërs was aan die buitekant vol mooi geestelike woorde en welvoeglike gedrag. Dit is egter kunsmatig aangewend en het nie uit hulle innerlike voortgevloei nie. Aan die binnekant was hulle harte kliphard en berekend. Mense probeer vandag steeds ander met hulle godsdienstig korrekte gedrag aan die buitekant manipuleer terwyl hulle eintlik bose planne beraam.
Die wetgeleerdes het Jesus gereeld probeer uitvang sodat hulle Hom kon vervolg. Jesus was egter nie blind vir hierdie manipulasie nie. Hy het goddelike onderskeidingsvermoë gehad en kon valsheid en boosheid onmiddellik agter die maskers identifiseer.
Het jy dieselfde goddelike onderskeidingvermoë? Kan jy situasies vinnig opsom en onderskei wat reg is om te doen? Kan jy mense ook opsom en onderskei watter soort gesindheid in hulle is?
Party van ons word gereeld mislei deur die heuningsoet woorde wat oor ander se lippe rol, maar dan kom ons later tot die skokkende ontdekking dat hulle glad nie is wie hulle voorgee om te wees nie. Inteendeel, hulle is net mooi die teenoorgestelde.
Ná ’n paar harde lesse het ek geleer om beter onderskeidingvermoë aan te kweek. Ek het geleer om ag te slaan op die stil stemmetjie binne-in my. Hierdie stemmetjie, het ek ontdek, is die stem van die Here wat sy kinders teen gevaar waarsku. Maak gebruik van hierdie
waardevolle goddelike leiding op jou pad deur die lewe.
Bruisgebed vir onderskeidingvermoë: Here, leer my om na die stil stemmetjie van waarheid binne-in my te luister – eerder as na soet woorde wat eintlik vals is. Ek wil u stem in my lewe volg.
Susan Coetzer, Bruistablette vir die lewe, 2018. Gereproduseer met toestemming van Lux Verbi, ’n druknaam van NB-Uitgewers.
