Julle het My nie uitgekies nie, maar Ek het julle uitgekies en julle aangestel om uit te gaan en vrugte te dra, vrugte wat sal hou (Johannes 15:16).
Die bestemming van die mens, die doel waarom en waarvoor ons hier op aarde is, word in die Bybel op verskillende maniere beskryf.
Dit gaan volgens die Prediker daarom dat ons die lewe as ‘n grootse gawe sal bly ontvang en geniet (Prediker 3:12-13). Of soos die Psalms dit stel: Dat ons God elke dag vir hierdie gawe sal bly loof en prys (Ps 144-150). Wat onder andere beteken dat ons God se droom vir ons lewe, sy goeie wil ‑ soos Christus dit bekend gemaak het ‑ sal bly soek en naleef (Matt 7:21).
Daar is inderdaad meer as een manier om die bedoeling van ons lewe op aarde te beskryf.
Uiteindelik gaan dit daarom dat ons ʼn vrugbare lewe sal lei ‑ een waarin God se genade en liefde tot volle bloei en rypheid in ons lewe sal kom, méér as net ons eie ambisies en ideale. Dít is waartoe Christus ons uitgekies en aangestel het. Só herinner Johannes ons (Joh 15:16).
Ja, dit is ‘n lewe waarin die Gees van God iets van Christus self in ons lewe gestalte begin gee. Sodat ons lewe nie droog, leeg of sinloos sal wees nie, maar eg, sprankelend, diensbaar, nuttig ‑ selfs verrassend vars en alternatief.
Net soos Christus s’n was.
O Here, ons lewe voel baie dae so leeg en sonder betekenis. Leer ons vandag weer deur u Woord wat dit beteken om ʼn vrugbare lewe te lei. Amen
Carel Anthonissen
