Wie sy vyeboom versorg, sal vye hê om te eet; wie omsien na sy werkgewer se belange, sal daarvoor eer ontvang – Spreuke 27:18.
Die Hebreeuse woord vir getrouheid is emet wat ook vertaal kan word as “waarheid”. Dit is verwant aan die woord “amen” wat beteken: “Dit is die waarheid. Dit staan vas.” In die Bybel word getrouheid dus verbind met die gedagte dat iets onwankelbaar is.
’n Betroubare mens is iemand op wie jy kan staatmaak. Hy is eerlik en kom sy beloftes na. Van nature is ons egter onbetroubaar en geneig om die waarheid te verdraai, of nie te hou by ’n belofte nie.
Dit was reeds in Bybelse tye ’n probleem om ware betroubare mense te vind. Salomo skryf in Spreuke 20:6: “Baie gee te kenne dat hulle getrou is, maar wie kan ’n werklik betroubare mens vind?”
Wanneer ’n kind tuis leer om in die klein dingetjies getrou te wees, word dit ’n beginsel waarvolgens hy lewe. Sy woord is sy eer. Sy “ja” is sy “ja”. Kortom, hy is iemand op wie ander kan reken.
’n Betroubare mens is ’n aanwins vir die samelewing. In ons huise, werkplekke en breë gemeenskap moet ons op mekaar kan staatmaak en absoluut vertrou. Ons mag nie ’n belofte nakom net wanneer dit ons pas nie. Wanneer ons belowe om terugvoering oor ’n saak te gee, moet ons dit doen. Wanneer ons vir iemand sê: “Ontspan. Ek sal self sorg dat die werk afgehandel word,” moet die persoon kan ontspan.
God is getrou. Hy laat niemand in die steek nie. Ek moet by Hom leer hoe ware getrouheid lyk.
Here, maak my getrou in die kleinste dingetjies. Amen.
