Die bepalings van die Here is reg: elkeen van hulle is regverdig. Hulle is kosbaarder as goud, selfs as baie goud, soeter as heuning, as druppels uit ’n heuningkoek – Psalm 19:10b-11.
God se voorskrifte en bepalings is soeter as heuning, skryf Dawid in Psalm 19. Heuning is suiwer. Daar is niks bygevoeg om dit soeter te maak nie. Ook word dit nie verdun sodat dit langer kan hou nie.
God se voorskrifte word nie as rigied en streng voorgestel nie, maar as soet en aangenaam. Sy gebooie is daar om ons lewensgehalte te verbeter. Dit wil ons versterk en help om met vreugde te lewe. Daarsonder is ons lewe sonder hoop en rigting.
Die eienaar van ’n onderneming wat ’n groot verskeidenheid byeprodukte vervaardig, vertel: “Met my ouers se troue het my oupa ’n byekas aan my pa gegee en gesê: ‘Jy is te arm om jam op my dogter se brood te sit. Hier is ’n byekorf. Nou kan jy heuning op haar brood sit.’” In Eksodus 3:8 sê die Here: “Daarom het Ek afgekom om hulle uit die mag van Egipte te bevry en om hulle daarvandaan te laat trek na ’n goeie en uitgestrekte land, ’n land wat oorloop van melk en heuning.”
Die Here, die God van Israel, is ook ons God. Gister en vandag en tot in ewigheid. Hy het vir ons die pad na ’n nuwe lewe saam met Hom in die Beloofde Land oopgemaak.
Ons hoef nie vir ééndag te wag nie. Ons kan nou reeds woon in die land wat oorloop van melk en heuning.
Here, leer my en voed my met u wysheid. Amen.
