Hulle het almal geëet totdat hulle genoeg gehad het. Later het hulle twaalf mandjies vol oorskietbrood en -vis opgetel. ’n Volle 5 000 mans het van daardie vyf brode geëet!
– Markus 6:42-44
Daar is ’n groot gaping tussen rykes en armes. Tussen dié wat te veel het en dié wat te min het. Tussen dié wat gelukkig is met ’n familie en genoeg liefde en ondersteuning en dié wat vergaan in hulle eensaamheid.
Die meeste van julle wat hier lees, het heel waarskynlik genoeg – dalk selfs meer as genoeg. Wat doen jy met jou oorskot uit die Here se hand? Wat doen jy met jou oorskietkos? Wat doen jy met jou oorskietgeld, jou oorskiettyd? Jou oorskietliefde en jou oorskietgawes? Deel jy dit uit? Laat jy dit net daar lê om te vergaan? Of krap jy dit uit in ’n drom om weggegooi te word?
Wanneer ons weer die verhaal lees van Jesus wat die brood en die vis vermeerder en meer as 5 000 mense kos gegee het, word ons herinner dat hulle die oorskietkos opgetel het. Die oorskiet is nie vir die voëls gelos nie. Daar was altesaam 12 mandjies vol oorskietkos.
Ek glo nie hierdie 12 mandjies kos is weggegooi nie. Die feit dat die mense dit opgetel en verpak en getel het, dui aan dat dit later nuttig gebruik is – om weer kos te gee aan dié wat honger was.
Hoeveel mandjies oorskiet kan jy verpak sonder om self skade te ly? Wat het jy om te gee om die sielshongeres mee te voed? Het jy dalk ’n mandjie oorskiettyd om uit te deel? Dalk ’n mandjie oorskietliefde? Alle oorskiet is bruikbaar vir die Here. Maak seker jy vermors nie jou
oorskiet nie.
Bruisgebed vir oorskiet: Vader, ek is so ryklik geseën. Help my om al my oorskot uit te deel aan dié wat nie het nie. Tot eer van u Naam.
Susan Coetzer, Bruistablette vir die lewe, 2018. Gereproduseer met toestemming van Lux Verbi, ’n druknaam van NB-Uitgewers.
