Kort daarna het Levi ’n feesmaal in sy huis aangebied met Jesus as die eregas. Baie van Levi se medetollenaars en ander gaste was daar. Maar die Fariseërs en skrifkenners . . . het by Jesus se dissipels gaan kla: “Waarom eet en drink julle saam met sulke immorele karakters?”
– Lukas 5:29-30
Die meeste mense heg dadelik ’n negatiewe konnotasie aan die woord rebel. Ons eerste gedagte is aan iemand met lang hare, tattoos en ’n neusring of twee. ’n Rebel het die reputasie van ’n belhamel wat gedurig stroomop is, wat hom wangedra en die samelewing omvergooi. Ons dink dadelik aan iemand soos James Dean in die fliek Rebel without a cause.
Tog is daar ook die rebelle wat ’n eerbare en veel groter doel najaag. Sulke mense verskuif grense, vernuwe denke en raak die gewete van die samelewing aan. Hierdie goddelike rebelle praat met dié wat hulle magsposisies misbruik om korrupsie en ongeregtigheid te bedek.
Wanneer ons na Jesus se lewe kyk, sien ons Hy was nie net die sagte mens met die lammetjie in sy arms nie. Hy was ook ’n passievolle rebel wat vir die waarheid opgestaan het.
Jesus was uitgesproke oor die valsheid en geestelike hoogmoed van die Fariseërs en Hy het hulle sienings openlik teengestaan. Jesus het byvoorbeeld saam met immorele mense soos die tollenaars geëet – iets wat totaal ongehoord was onder godsdiensleiers. Hy het op baie
wetgeleerdes se tone getrap, so erg dat hulle gesorg het dat Hy aangekla en doodgemaak word. Maar uiteindelik het hierdie goddelike Rebel die grootste geestelike vernuwing van alle tye bewerkstellig.
Ek glo ons land het meer eerbare rebelle nodig wat die stryd sal aanpak en alle leuens en ongeregtigheid sal blootlê – om Jesus ontwil.
Bruisgebed vir rebelle: Dankie, Here Jesus, vir u voorbeeld as ʼn goeie rebel wat opgestaan het vir deursigtigheid, waarheid en geregtigheid. Help my om dieselfde te doen, tot eer van u Naam.
Susan Coetzer, Bruistablette vir die lewe, 2018. Gereproduseer met toestemming van Lux Verbi, ’n druknaam van NB-Uitgewers.
