Hy maak my voete soos dié van ’n ribbok; op hoë plekke laat Hy my veilig staan.
– 2 Samuel 22:34
Die jaar 2017 was vir my ’n berg van ’n jaar om teen uit te beur. Ek was pal voor die rekenaar besig met skryfprojekte, en tussenin op reis as spreker. Die grootste uitdaging was egter die epidemie van onbetroubare diensverskaffers wat dinge op my erf moes herstel.
Hierdie plaag sprinkane het my emosies baie omgekrap. Ek is finansieel uitgebuit, beroof en my begroting vir die Kersseisoen is totaal in die wiele gery. Ek het gewonder of ek hulle een vir een moes aanvat en met my mond moet uitsorteer.
Die sagte stemmetjie van wysheid het my egter aangeraai om nie by battles betrokke te raak met onwaardige opponente nie. Hulle sou in elk geval nie verantwoordelikheid vir hulle oneerbare aksies aanvaar nie. Sulke battles met geestelik blinde en dowe mense sou my net van nog meer kosbare tyd en energie beroof.
Ek het besluit om stil te bly en die Here te vertrou. Hy het my moeë gees opgelig en my hoog op ’n stil rotslys neergesit. ’n Vrede het oor my neergedaal. Soos ’n ribbok, kon ek alles van bo af beskou en die battles vol leuens aan Hom oorlaat … terwyl ek op my skryfwerk
konsentreer.
So dikwels word ons verlei deur ons onstuimige emosies om by moddergevegte met onwaardige opponente betrokke te raak – soms sommer openlik op sosiale media. Kies die waardige pad. Laat toe dat die Here jou voete soos dié van ’n ribbok op hoë geestelike plekke plaas. Laat Hy die battle teen die leuens namens jou fight.
Bruisgebed vir taai situasies: Here, help my om uit te styg bo my situasie. Plaas my voete op hoë en vaste plekke, soos dié van ʼn ribbok. Help my om die battle teen leuens aan U oor te laat om te hanteer.
Susan Coetzer, Bruistablette vir die lewe, 2018. Gereproduseer met toestemming van Lux Verbi, ’n druknaam van NB-Uitgewers.
