“Kom na My toe, almal wat uitgeput en oorlaai is, en Ek sal julle rus gee. Neem my juk op julle en leer van My, want Ek is sagmoedig en nederig van hart, en julle sal rus kry vir julle gemoed” – Matteus 11:28-29.
Christus het by uitstek die lewenskuns verstaan om volkome tot rus te kom. Hy het dit reggekry om sy volgeskryfde kantlyn met een veeg skoon te vee.
Hy kon Homself aan ’n skare mense onttrek om die stilte van sy Vader se teenwoordigheid op te soek. Hy kon saam met sy dissipels op die stil waters van die See van Galilea uitvaar sodat hulle deur sy wysheid en kalmte gevoed kon word.
Kenosis is die Griekse woord wat beteken “om te laat los” of “om van jouself leeg te word”. Om dinge waaraan jy vasklou te laat gaan, beteken allermins dat jy die handdoek ingooi.
Die bekende Dominikaanse mistikus Meister Eckhart (1260-1328) het gesê: “God word nie gevind deur iets by jou lewe te voeg nie, maar deur dinge weg te neem. Dit is nie ’n optelsom nie, maar ’n aftreksom. Die antwoord waarby ’n mens tot jou eie vreugde en verbasing uitkom, is: Minder is inderdaad méér.”
Ek moet God se stilte opsoek. Ek moet stil word in my verwagting dat Hy – die almagtige God – met my wil praat. En dan – wanneer ek die krag van binnestilte ontdek – begin ek myself en my medemens beter verstaan en aanvaar.
Ons diepste hartsverlange is na God. Op sý beurt trek Hy ons na Hom toe aan. “Kom!” eggo sy stem deur alle eeue. “Kom na My toe!”
Here, dankie dat ek by U tot rus kan kom. Amen.
