Die Here het ’n afsku van ’n skaal wat nie reg weeg nie; net die regte gewig dra sy goedkeuring weg.
– Spreuke 11:1
Het jy al ooit aan ’n skaal gepeuter? Ek moet erken ek het al. Jare gelede, as ’n oorgewig tiener, het ek graag meer na die een kant van die skaal toe oorgeleun wanneer ek myself geweeg het. Só kon ek die skaal se lesing manipuleer. Wanneer ek die skaal só gekul het, het ek ’n kilo of twee minder geweeg as wat ek regtig geweeg het. Maar in my binnekant het ek geweet die lesing was nie akkuraat nie.
Vandag is ek ’n volwassene en ’n volgeling van die Here. En ek weet nou Hy het ’n afsku van ’n skaal wat nie reg weeg nie. In gewone Afrikaans beteken dit die Here haat leuens van enige aard, ook daardie klein leuens wat ons so graag onder die mat invee en kies om te ignoreer.
Die waarheid is vir die Here geweldig belangrik – ook in die klein dingetjies en gewoontes in ons lewe. Net die regte gewig – dit is, die waarheid – dra sy goedkeuring weg.
Kom ons gaan staan vandag op sy skaal en neem ’n paar lesings. Hoe gereeld manipuleer jy die skaal van die lewe om beter te lyk? Jok jy dalk vir jou man oor hoeveel daardie skoene regtig gekos het? Glo jy om die waarheid hier en daar effens te verdraai is onbenullig en
onbelangrik in die Here se oë?
Om gereeld noodleuens te vertel kan maklik tot ’n leefstylgewoonte lei waarin die verdraaide waarheid geleidelik glad nie meer jou gewete aanpraat nie. Kom ons bely dan vandag ons onakkurate skaal en stel die naald weer op die waarheid in.
Bruisgebed vir die waarheid: Vader, ek wil U tevrede stel en U gelukkig maak. Daarom kies ek om my lewe altyd op ’n skaal te plaas wat reg weeg. Tot eer van u Naam.
Susan Coetzer, Bruistablette vir die lewe, 2018. Gereproduseer met toestemming van Lux Verbi, ’n druknaam van NB-Uitgewers.
