Dit is God se wil dat julle goeie gedrag die mense wat uit onkunde van julle kwaadpraat, sal stilmaak.
– 1 Petrus 2:15
Die voorbeeld wat Jesus vir ons gestel het, is altyd dié van ’n ware heer. Hy was taktvol, sensitief en wys. Hy het mense nie met sy oortuigings gebombardeer nie. Hy het nooit toegelaat dat mense Hom by godsdienstige argumente intrek wanneer hulle in hulle onkunde van Hom kwaad gepraat het nie. Hy het net stilgebly en toegelaat dat sy goeie gedrag getuig oor wie Hy werklik is.
Ons kan so baie uit Jesus se wyse en sagmoedige voorbeeld leer. Hoe voel jy wanneer mense in onkunde van jou kwaadpraat en jou agter jou rug beskinder? Ons kniereaksie is gewoonlik om onsself te verdedig en oorlog te verklaar. Hierdie reaksie is egter nie in pas met vandag se Bybelvers nie en het gewoonlik nie ’n positiewe uitkoms
nie.
Ek het deur die jare geleer dat nie alle mense waardige opponente is nie. Ek kies dus my battles met baie meer omsigtigheid. Wanneer mense in onkunde leuens oor my kwytraak of agter my rug kwaadpraat, deurdink ek my reaksie en bespreek dit met die Here. Sy raad
aan my is altyd dieselfde: Laat jou konsekwente en deursigtige gedrag die mense wat so stir, stilmaak.
Kom ons weerstaan ons oerreaksie om aan die ego battles deel te neem en onsself met kwaai woorde te verdedig. Kom ons styg uit soos die arende wanneer mense in onkunde van ons kwaadpraat. Laat jou goeie gedrag en standvastige karakter, eerder as jou woorde, die
kwaadpraters stilmaak en getuig oor wie jy regtig is.
Bruisgebed vir oorwinning: Here, help my om stil te bly. Laat my voorbeeld van goeie gedrag die mense wat van my kwaadpraat, stilmaak. Tot eer van u Naam.
Susan Coetzer, Bruistablette vir die lewe, 2018. Gereproduseer met toestemming van Lux Verbi, ’n druknaam van NB-Uitgewers.
