Erken in julle harte Christus as die een wat seggenskap het. As julle dit doen, en iemand vra julle uit oor die hoop wat in julle leef, wees altyd reg om te reageer. Doen dit egter taktvol en eerbiedig.
– 1 Petrus 3:15-16
Hoe leef jy jou Christenskap uit? Is jy iemand wat vreemdes ongevraag bombardeer met bekeringspreke? Of gebruik jy meer takt soos die Bybelvers hierbo ons aanraai om te doen? Wag jy tot mense jou oor jou geloof uitvra?
Ek het geleer dat ’n hardhandige aanslag mense eerder kan afskrik as om hulle te oorreed om hulle harte vir die Here te gee. Ek self raak geïrriteerd met mense wat dit hulle stokperdjie maak om gereeld vir my geestelike stukkies te forward om my te bearbei. Soms kry ek dieselfde stukkie wat op die oomblik in die mode is sommer vyf keer op dieselfde dag.
By ’n diens by Mosaïek-gemeente het een van die predikers vertel hoe hy en ’n vriend as jongmense vreemdelinge sonder enige takt probeer bekeer het. Hulle het elke Sondag ná kerk langs die pad gaan staan en gemaak of hulle ’n saamrygeleentheid soek. Sodra hulle in
iemand se motor was, het hulle mekaar ’n kyk gegee en losgetrek met hulle bekeringspreek. Die prediker het ’n goeie humorsin en daardie dag het hy gesê hy hoop hy het nie te veel mense van die Here afgeskrik met sy taktlose en oorgeesdriftige bekeringspreke nie.
Kom ons leer vandag by Jesus. Hy het altyd eers die mense oor hulle lewe uitgevra, saam met hulle geëet en belanggestel in hulle doen en late. Later het Hy brood aan tafel saam met hulle gebreek voordat Hy die brood van die lewe aan hulle bedien het.
Bruisgebed vir taktloses: Vader, help my om my geloof liefdevol uit te leef en met takt en eerbied te reageer wanneer ek oor my geloof in U uitgevra word. Tot eer van u Naam.
Susan Coetzer, Bruistablette vir die lewe, 2018. Gereproduseer met toestemming van Lux Verbi, ’n druknaam van NB-Uitgewers.
