“Julle ignoreer God se opdrag en hou ten koste daarvan aan menslike tradisies vas.” Hy sê toe weer vir hulle: “Julle verstaan die fyn kuns om God se opdrag opsy te skuif sodat julle julle tradisie kan handhaaf.”
– Markus 7:8
Ons leer van kleins af om tradisies te onderhou – by die skool, op die sportveld, in ons families en natuurlik by die kerk. Tradisies is vaste gewoontes of instellings wat ons deur die jare heen navolg.
Hoe belangrik is godsdienstige tradisies vir jou? Ruim jy soms tyd in om na te dink oor die tradisies wat jy slaafs navolg? Maak jy tyd om te besin of dit altyd in ooreenstemming met God se opdrag van omgeeliefde is?
Die Skrifgedeelte hierbo waarsku ons teen die gevaar om tradisies die hoeksteen van ons oortuigings te maak. Dit kan selfs tot dwaalleringe lei: “Julle ignoreer God se opdrag en hou ten koste daar van aan menslike tradisies vas.” Hy sê toe weer vir hulle: “Julle ver staan
die fyn kuns om God se opdrag opsy te skuif sodat julle julle tradisie kan handhaaf.”
Lees gerus die hele Markus 7 en vra die Here of jy dalk jou tradisies gebruik om sy grootste opdrag om altyd met omgeeliefde op te tree, verontagsaam.
Een van die voorbeelde wat die Bybel hier noem, is om Moses se wet – eer jou vader en jou moeder – te omseil. Jy gee geld vir die kerk, maar jy het nie geld om jou bejaarde ouers te help nie. Jy sê jy behandel jou ouers met respek, maar ignoreer hulle nood.
Maak seker jou tradisies versper nie jou pad om die Here se opdrag – om omgeeliefde met ’n suiwer hart uit te leef – na te kom nie.
Bruisgebed vir omgeeliefde: Here, help my om nooit tradisies en wette belangriker as u groot opdrag te maak nie: om u liefde teenoor alle mense uit te leef.
Susan Coetzer, Bruistablette vir die lewe, 2018. Gereproduseer met toestemming van Lux Verbi, ’n druknaam van NB-Uitgewers.
