“Let op hoe groei die veldlelies: hulle swoeg nie en hulle maak nie klere nie . . . As God dan die gras van die veld, wat vandag nog daar is en môre verbrand word, so versier, hoeveel te meer sal Hy dan nie vir julle sorg nie, julle kleingelowiges?”
– Matteus 6: 28, 30
Elke nou en dan raak ek benoud oor my finansiële vooruitsigte as ʼn vryskutter met ’n groot huisverband en baie ander uitgawes per maand. Ek het geen vaste werk nie en ook nie meer my eie onderneming nie. Ek is totaal aangewese op die ontwikkeling van my gawes en die Here se seën daarop.
Die afgelope jaar het ek die meeste van my tyd aan skryfprojekte gewy, waarvan ek nie dadelik die oes of enige wins kan sien nie. In sulke gevalle is vandag se Bybelvers baie bemoedigend vir my. As die Here na die veldlelies kyk (my naam, Susan, beteken juis “veldlelie”), hoekom sal Hy dan nie ook na my omsien nie?
Geloof en vertroue is baie maklik in die sigbare wêreld. Wanneer jou inkomste egter uit die Onsigbare se hand kom, vra dit dat jy jou geloof sal verskerp en jou vertroue in Hom as die Voorsiener sal verhoog.
Wanneer ek gespanne raak oor my geldsake knoop ek ’n gesprek met die Here daaroor aan. Ek kry altyd dieselfde antwoord van Hom terug – ek moenie stres nie en net rustig voortgaan met my werk en elke dag my deel doen. Soos die veldlelies, moet ek op Hom vertrou vir die oes. En die Here het my al soveel keer verras met onverwagte oeste – presies op die regte tyd!
Mag jy Hom ook só leer vertrou.
Bruisgebed vir finansiële stres: Vader, dankie dat U in beheer van my lewe is – ook van my geldsake. Help my om altyd my bes te doen en U met die res te vertrou.
Susan Coetzer, Bruistablette vir die lewe, 2018. Gereproduseer met toestemming van Lux Verbi, ’n druknaam van NB-Uitgewers.
